المتهم الثالث بسرقة محمد صلاح: ”قالولي هنبيع ميدالية فخر العرب وهنعدي”| نص تحقيقات

حصلت "النهار المصرية"، على نص تحقيقات قضية سرقة فيلا لاعب منتخب مصر وليفربول، على يد 3 أشخاص من بينهم فرد أمن كان يعمل سابقًا بالفيلا.

وننشر اعترافات "محمد.أ"، سائق توك توك، 21 عامًا، والمتهم بإخفاء المسروقات بعد سرقتها من داخل فيلا محمد صلاح.

وقال المتهم: "أنا أعرف عادل ومصطفى من زمان وفي يوم عادل قاللي تعالى عاوزك في موضوع ولما قعدنا قالنا الموضوع اللي عاوزكم فيه هيعدينا، وأنه كان شغال في مدينتي والناس هناك معاهم فلوس كتير ومش بيدوروا على الفلوس اللي بتضيع منهم وطلب مني أني آجي واعتبرها فسحة معاهم".

وأردف: "بعدها سمعتهم وهما بيتفقوا وبيقولوا إن واحد منهم هيبيع تليفونه ولو معرفش يجيب حاجة هيعتبرها فسحة، وأنا قلتلهم أنا مليش علاقة بالموضوع، ومن يوم القعدة دي مشوفتهمش وفي يوم شوفت عادل وعلى ضهره شنطة جملي وراح محل وشفته وهو بيطلع 3 ريسفرات وراح باعهم وقاللي أنا سرقت فيلا محمد صلاح".

وأشار: "وبعدها لقيته طلع ميدالية فضة من شنطته وبيقولي دي اللي هتعدينا وهنبيعها، وبعدها بفترة شوفت ستوري محمد صلاح إنه اتسرق وكان بيهزر هو وهنيدي وأنا قلتلهم أنتوا جايين تسرقوا أشهر واحد في العالم وبعدها اتقبض عليا".