عبدالناصر زيدان يفتح النار على رامز جلال: مكانش ده اتفاقنا ووكّلت محامين

تحدث الإعلامي عبدالناصر زيدان عن حالته الصحية عقب الظهور في برنامج «رامز جاب من الآخر»، ولجوئه إلى القضاء لأخذ حقوقه.

وقال عبدالناصر زيدان في حوار له مع «et بالعربي» :آخر أشعة عملتها من ٤٨ ساعة وبدأ إلتآم العظام، ولكن هفضل معلق دراعي لمدة 3 شهور، وهعمل أشعة كل 10 أيام، والجرح مضايقني على المستويين الشخصي والإنساني.

وأضاف: لازم أفصل ما بين إدارة Mbc وأصدقائي السعوديين والمصريين المسؤولين عن البرنامج لم يكونوا على قدر من المسؤولية والاحترام، أنا زعلان منهم سواء من رامز جلال أو مهيب عبدالهادي إللي إتفق معايا إني رايح أعمل حوار مقابل 150000 جنيه مش رايح أتكسر وأعيش بعاهة.

وتابع: بعد ما المقلب خلص مكانوش عارفين إني أتكسرت، وحصلت مشكلة وسابوني في اللوكيشن ومشيوا، ولولا إني عليت صوتي وعملت مشكلة مكانوش ودوني المستشفى.

واستكمل: تطورات حالتي الصحية خلتهم عايزين يرضوني بأي طريقة، تاني يوم إدوني 35000 درهم على أساس إن الأمور بسيطة، واكتشفت من خلال الرنين المغناطيسي إنه كسر كبير ويستوجب 6 شهور تعليق دراعي وعملية ممكن تكون خارج مصر.

واختتم عبدالناصر زيدان حواره قائلًا: أنا مش هسيب حقي في محامين تولوا الأمر، وأعتقد إنهم هيردوا المبلغ في المحكمة، لأن الموضوع مش فلوس، أكتر منه تقدير، أنا بعتز بإدارة mbc ومعنديش مشكلة في إذاعة الحلقة، لكن التجاهل وعدم السؤال أعتقد إنه هيكلفهم كتير معايا.