هالة صدقي خلال تكريمها من مهرجان الأقصر للسينما الأفريقية: بنصح أي فنان يعمل مشروع خاص بعيد عن الفن

وجهت الفنانة هالة صدقي نصيحة للفنانين خلال ندوة تكريمها من مهرجان الأقصر للسينما الأفريقية في دورته الثانية عشر، بأن يكون لهم مصدر رزق من خلال مشروع آخر، موضحة أنها بدأت بالفعل في مشروعها الخاص وقالت: مهم يكون للفنان مشروع خاص وأنا بعمل مطعم لأن الفن الحكاية اختلفت في صفحة اتقلبت وأنا بنصح أي فنان يعمل مشروع غير الفن.
وأضافت هالة صدقي خلال ندوة تكريمها: لما بيجيلي حد من أصحابي عايز يدخل المعهد بنصحة أن لأ عشان هتعمل إيه، أنا لو ولادي هقولهم لأ مش هينفع لأن أنا مليش مستقبل مليش ضمان مليش تأمين ولا معاش لو أي فنان جراله حاجة في أي لحظة اتركن وقعد، لو فنان عمل أي غلطة في حياته الناس بتقفل منه، الفنان عامل زي لاعيب الكرة لو اتخبط خبطة حياته انتهت.
وتابعت صدقي قائلة: بشوف نماذج الناس الكبار القدام كلهم اتوفوا وهما معندهمش رصيد مادي وأغلبهم بندور لهم على حد يتكفل بيهم أنا بشفق على كل زملائي لأن الفنان بيبقى عنده عزة نفس وكرامة بعد ما كان نجم ازاي هيطلب مساعدة أو هيقدم دور صغير، أنا ادعي أني صديقتهم كلهم في ناس كتير زملاء تعبانين وقاعدين في البيت ومش فنانين بس في كتاب ومخرجين كبار قاعدين في البيت مبيشتغلوش، احنا المنارة الثقافية لبلدنا أنا مش ضد الشباب لكن فين الكتاب الكبار طيب هو هيصرف على نفسه وأولاده إزاي؟